Hannibal, postquam Pyrenaeos montes

Hannibal, postquam Pyrenaeos montes facile transgressus est, ad Alpes montes cum exercitu et iumentis, inter quae etiam elephanti, pervenit. Hannibalis inceptum ingens et difficillimum fuit : nam antea nemo umquam hos montes cum exercitu transierat. Praeterea montium altitudo niviumque moles milites Carthaginienses, qui famā iam cognoverant transitum terribilem fore, magis etiam terrebant. Postquam vero Hannibal suos hortatus est, agmen primā luce incedere coepit. Nono die per invia et errores tandem in summum montem pervenerunt, ubi militibus labore ac proelio fessis quies per duos dies data est. Nivis autem casus gravior ingentem terrorem renovavit. Agmen per loca nive oppleta segniter incedebat, atque desperatio in omnium vultu eminebat. Tum Hannibal in loco quodam, unde longe ac late prospectus erat, milites consistere iussit. Italiam camposque circumpadanos ostentans: ‘Moenia nunc transcenditis,’ inquit, ’non Italiae modo, sed etiam urbis Romae ; mox descendere et in plana iter facere poteritis ; paucis proeliis caput Italiae in manu ac potestate habebitis.’